3 Johr Joa!

Ziit rast liebe Joa. Hüt bisch Du scho 3 worde. Die letschte drü Johr sind wiä im Flug vergange und Du bisch vom Säugling zumä richtig grosse Buäb worde. Du häsch no gfehlt i üsere Familie und machsch üs komplett. Es isch so schön, bisch Du no zu üs cho und machsch üs mit dem herzliche Gmüät s’Läbä no es bizzli schöner.

Du bisch so en ringe Buäb, spielsch so viel und gern. Dini Fantasiewelte sind grossartig zum miterlebe und ab und zuä simmer sogar mittedrin und müänd en Füürwehrschluuch hebe oder süsch öppis Imaginärs 😆
Spiele tuäsch in letschter Ziit ganz viel mit de Hündli vo Paw Patrol oder mit dä Schleichtierli, mit Traktore, em Chrane und andere Fahrzüüg. Du chochsch gern idä Spielchuchi und gohsch im Verchäuferlilade go poschte oder bisch ade Kasse.

Sit de Summerferiä gömmer zämä is Mukiturne. Du liäbsch es und machsch immer uh guät mit, chasch scho d’Liädli mitsinge und hilfsch ufstelle und abruume wiä en Grosse!

In Sache ässä bisch de Bescht! Du probiersch alles und häsch s’meischte gern 🙂 Da hemmer bis jetzt nöd kennt.

Du liäbsch Dini Öpfeli-Nuschis und ohni diä goht gar nüüt. Underdesse hemmer 4 Stugg und mir passed sehr guät druff uf, wiil süsch hemmer denn s’Theater!!

D’Elina und Du sind noch wiä vor e Herz und e Seel. Sie macht alles für Dich und het uh viel Geduld mit Dir. Usserd Du bringsch i ihrem Zimmer näbis durenand, denn finds au sie nümä luschtig.
Mit em Finn häsch chli aagfange striite… und Du spielsch gern de Polizischt und verzellsch allne chli, was dörfed und was nöd…

1x idä Wuchä gohsch Du id Kita und noch eme Johr isch es jetzt würkli so, dass Du gern gohsch und Dich amel freusch uf Kita.

Mängmol häsch es sturs Grindli und Du weisch ganz gnau was wöttsch. Du bisch sprochlich scho sehr wiit. Seisch s „SCH“ und au s „R“ scho absolut problemlos und häsch en riese Wortschatz. Täglich chunnt neus dezuä. Du redsch au wiä en Wasserfall vom Morge früä bis z’Obig spot…

Liebe Joa, Du bisch so en Sunnäschii. Blieb wiäd bisch, mir hend Dich alli so fescht gern!!