9ni

Liäbä, liäbä Finn!

Es isch endli so wiit, Du häsch Geburtstag und bisch hüt 9ni worde! Es isch ganz en wichtige Geburi gsi für Di.

Mir hend es turbulents Johr hinder üs. Es isch eigentlich vor allem um Dini schuälisch Situation gange. Idä 2. Klass bisch Du total underforderet gsi und häsch es überhaupt nümä lässig gfunde idä Schuäl. Mir hend ganz viel Möglichkeite abtscheggt und dürägspielt, aber schlussendli isch nur no s’Überspringe vo dä 3. Klass e Lösig gsi.
Jo und jetzt bisch Du also mit 8ti en 4. Klässler worde. Notürli mit Abstand de Jüngscht idä Klass, aber so wiä mir da chönd beurteile, bisch Du guät ufgnoh worde. Und s’wichtigscht isch: es gfallt Dir. Und Du findsch Din Lehrer de Herr Hürlimann eifach super.
Husi machsch allerdings immer nonig gern und Du weigerisch Dich standhaft irgendöppis für e Prüäfig z’lerne.
Mir sind jetzt gspannt uf’s Gspröch wommer gli hend mit Dim Lehrer.

Du häsch noch wiä vor en sture Grind und weisch debi ganz gnau wad möchtsch. Du bisch en luschtige Kerli, häsch immer en Spruch parat und bringsch üs ganz viel zum Lache. I däm Johr bisch jetzt notürli no e Spürli cooler worde, wiil Du jetzt immer mit dä Ältere zämä bisch 😉

Din Liäblingsspruch isch: chills mol, Mami. Oder au eifach: Chillax!

Du bisch noch wiä vor e Sportskanone und chasch nöd gnuäg übercho vo Fuässball und Unihockey. Bim Skifahre machsch es au super und falls ich denn wieder mol uf d’Ski stoh, chumi Dir wohrschinli nümä noh.
Läsä tuäsch immer no glich viel wiä sit eh und jeh und au imä erstuhnlich hohe Tempo.

Du häsch de Joa uh chogä fescht gern und do goht eim s’Herz würkli uf. Und er vergötteret Dich au!
Mit de Elina isch au wiä eh und je. Mol gohts super mit Eu zwei und mol striitet ihr de ganz Tag. So isch es halt 😉

Blieb so offä, liebeswert, cool und herzig! Vilicht bizzli weniger diskutiere und bizzli meh folge 😉
Mir hend Dich ganz fescht liäb, Du grosse Kerli Du!