7ni

Wow, wow, wow! Finn, üsän grosse Buäb! Hüt fiirsch Du Din 7. Geburtstag!

Will Du geschter spot iigschlofe bisch, häsch es hüt nöd gschafft zum vor üs ufstoh 😉 aber bisch denn doch scho am halbi Siebni uf de Matte gstande 😉
Über Din Geburstatgstisch häsch Du Dich au dajohr wieder sehr gfreut. Und wiil d’Elina Dir au 2 Päckli gmacht hät, bisch Du dajohr so richtig fescht beschenkt worde.

I glaub, Du bisch nöd fescht gwachse im letschte Johr, wiil Du häsch letscht Johr am Geburi genau s’glich Pischi agha 😆

Es isch wiä immer es ufregends Johr gsi mit Dir.

Du häsch de Chindergarte abgschlosse und d’Frau Erne het Dich mit guätem Gwüssä id Schuäl gschickt. Du häsch mit dä Frau Beck ganz e tolli Lehrerin übercho, wo weiss, was Du chasch und wo au weiss, wiä sie mit Dir z’Schlag chunnt 😉

Inäs paar Täg hemmer s’erschte richtige Elteregspröch und mir sind uh gspannt, was sie üs denn über Dich verzellt. Schuälisch mached mir üs ka Sorge, meh so s’ander, wo näbd em Schuälstoff no so isch 😆

Sprochlich bisch immer no recht wiit vorus. Zum Schwätzä anä, häsch jetzt notürli au no so richtig läsä glernt. Es goht scho super und Du machsch es au guät. Mir tüänd jede Obig zämä läsä. Z’erscht Du es Stugg, denn mir.
Du tuäsch gern diskutiere und lohsch nüüt uf Dir sitze. Du häsch zu allem e Meinig und tuäsch diä au vehement verträtte. Es isch mängisch chli aastrengend, wemmer alles müänd usdiskutiere.

Dementsprechend fallt Dir aus s’Folge schwer. Nöd nur dehai, au idä Schuäl. Wenn Du öppis am mache bisch und das wöttsch fertig mache, denn isch de Stritt vorprogrammiert, wemmer Dich nöd loht oder wenn’s vo dä Ziit her eifach nöd drin lieht.

Dis Liäblingsfach idä Schuäl isch Mathi. Du bisch idä erschte Wuchä sehr enttüscht gsi, wiil ihr jo gar nöd richtig tüänd rechne idä Schuäl. Aber jetzt gohts langsam los und Du bisch begeischteret. Da sind amel au Dini Liäblingshusi und Du machsch es innert wenige Minute.
Am liäbschtä würsch au scho alles wild durenand rechne mit mol und geteilt und Prozent und alles. Du frogsch üs deswege Löcher in Buuch. Di mathematisch Begobig i Dim Genpool häsch definitiv vom Papi… ich has nämli nöd gern, wenn ständig mit mir über zahle redsch 😛

In Sache Gsundheit hemmer e guäts Johr gha. Du bisch relativ gsund gsi. Erscht churz vor de Wiänacht häsch wieder mol meeega fescht de Huäschtä gha.
Du häsch s’erscht mol en richtige Unfall gha und Dir de Arm broche. Und gad letscht Wuchä simmer mol wieder bim Zahni gsi, wiil Du uf’s Muul keit bisch…

Dini Liäblingsfarb isch immer no grüän 😀

Mit em Esse isch es nöd eifacher worde mit Dir. Du häsch so Dini paar Liäblingsesse und wemmer diä chochet isch alles guät und recht. Und süsch chasch ziemlich blöd tuä…
Du bruchsch immer no mind. 1x am Tag Müäsli, süsch bisch Du nöd glücklich 😛

Du machsch immer no wahnsinnig gern Spieli! Mir hend chönnä aafang so richtig lässigi Sache spiele. Monopoly, Siedler, Ligretto… alles Spieli wo s’Mami au gern macht 😀
Spörtle tuäsch au immer no gern. Idä Feriä in Serfaus simmer s’erscht mol go chlettere und das häsch Du mega läss gfunde und redsch immer devo, dass mir da wieder mol müänd mache!
Und mit Büächer chammer Dich au immer begeischtere. Will Dis Mami au so gern schöni Büächer het, chasch Du gli e Bibliothek ufmache 😉

Mit de Elina gohts mol guät, mol schlecht. Es chunnt immer chli drufah, i wellere Verfassig ihr beide sind. Es sind vor allem d’Wuchenende und d’Feriä, wonner am Morge amel stundelang mitenand spieled, au ohni striite. Im Pischi 😆 das isch immer sehr herzig zum Zuäluägä.

Du bisch herzig, luschtig, wiff… und en riese Spitzbuäb!
Mir liäbed Dich uh fescht und würed Dich niämols hergeh!