9ni

Liäbi, liäbi Elina

Lagomio, jetzt bisch Du hüt au scho 9ni worde!
Es isch chli en luschtige Geburi gsi, will hüt gad au no Dorfgrümpeli gsi isch. Am Morgä hemmer gad no so Ziit gha zum Gschenkli uspacke, bevor mir denn alli as Grümpi gange sind. Zum Glück isch es Dir schnuppe, eb Du verlüürsch oder gwünnsch… süsch wärsch vilicht chli trurig gsi hüt 😉

Über Dich chönnti e ganzes Buäch schriebe 🙂 Du bisch sone cooli Bohne und di allerbescht gross Schwöschter wo’s git uf de ganze Welt! De Joa vergötteret Dich und Du nimmsch Dir sehr hüüftig Ziit für ihn. Du machsch das echt toll. Mit em Finn… äh jo… ich nimm ah, Du erinnerisch Di spöter guät, wiä’s gsi isch. Do muäs ich nöd z’viel dezuä sägä… nur so viel… Du häsch diä Wuchä, wo er im Lager gsi isch, sehr gnosse 😛

Idä Schuäl lauft de Charre. Du bisch nöd übermässig fliessig, aber es fallt Dir uh chogä ring. Do simmer notürli froh. Mit dä Frau Bleuer chunsch guät z’Schlag und Du gohsch mega gern id Schuäl und machsch au gern Husi 😉 Idä Klass häsch uh viel Gspänli und Dini Fründinne sind Dir uh wichtig. Ihr sind au ständig am abmache und zämähöckle.

Du häsch e choge sturs Grindli und lohsch Dir lang nöd alles büüte. Du chasch total usflippe und Dich i alles mögliche inästeigere 😆 aber chunsch au immer wieder uf de Bode vo dä Tatsache zrugg.

Rössli sind im Moment s’ein und alles für Dich. Du riitisch für’s Läbä gern und spielsch au dehai immer Pferd mit allnä wo gad mitmached oder au ellai.
Unihockey spielsch au immer no und Du häsch Di sogar defür entschiede, i därä Saison mit dä Buäbä Meischterschaft z’spiele. Mir sind ganz gspannt 🙂

Blieb so e glatti, ufgstellti Bohne mit ere eigne Meinig. Du bisch super und mir hend Dich mega fescht lieb!