7ni

Wow, wow, wow! Elina, üsi grossi Bohnä! Hüt bisch Du 7ni worde!! Wiä schnell isch das jetzt gange…!

Hüt Morgä bisch e bizzeli schneller us dä Fädärä cho, wiil Du Geburi gha häsch… aber so richtig ufstoh häsch nöd mögä. Bisch halt immer no e Siebeschlööferin.
Wo Du denn Din Geburitisch gseh häsch mit dä Gschenkli, bisch aber glich no wach worde 😉

Du bisch so e Grossi worde. Idä Schuäl zellsch Du zu de Gröschte und überragsch vor allem d’Meitli di meischte um en ganze Chopf 😆

Vor es paar Wuchä häsch Du de Chindi abgschlosse und jetzt vor nöd emol 2 Wuchä bisch Du id Schuäl cho. Es isch allerhöchschti Isebahn gsi. Du chasch nämli scho lang schriebe und lese und au im Rechne teschtet de Finn immer wieder, was Du so chasch. Und da isch einiges für en 1. Gix 😉
Mir sind gspannt, wiä’s bi Dir so lauft, aber mir sind überzüügt, dass Du da ganz wunderbar machsch. Dini Lehrerin d’Frau Bleuer findsch Du ganz e Lässigi und Du gohsch uh gern id Schuäl und Du liäbsch d’Husufgobe 😉 mol luägä, wiä lang no 😆

Du häsch recht uftrüllt idä letschte zwo Johr… Du bisch mittlerwiilä au recht luut und seisch (schreisch), wenn Dir öppis nöd passt. Z’Obig bisch amel so durä, dass öppädiä ein vo Dinä Afäll häsch, wo’s ganz Huus zämäbrüllsch, wäg ere Chlinigkeit. Aber ich bin sicher, dass mir da no in Griff öberchömed. (HOFFENTLICH!)

Du bisch wahnsinnig kreativ. Du chasch stundelang baschtle und moole und häsch au selber Ideeä, was Du chönntsch mache und wiä Du’s chasch umsetze. Du häsch au e neui Liideschaft entwicklet: Du liäbsch Schriiber, Papier, Chläber, allgemein Papeterie- und Baschtelsache. Und getreu em Motto: „vo däm chammer niä z’viel ha“, sammlisch Du alles, was Dir id Finger chunnt, wöttsch bim Poschte jedes mol öppis Neus und wünschisch Dir da alles au zu jedem mögliche Alass.

In Sache Gsundheit laufts guät. Du häsch zwor öppä de Huäschtä, au im Summer… chunnt wohrschinli devo, dass Du all im Pool hocksch (dodezuä spöter 😉 ) und drum häsch mängisch denn chli en Huäschtä. Aber im Gegesatz zu früäner, isch de nöd störend und goht immer vomellei wieder wäg.

Dini Liäblingsfarb isch orange. Du häsch aber au immer no gern pink und türkis findsch au schön.

Esse… hach… es leidigs Thema bi Dir… bi Eu… mängisch hani s’Gfühl, Du motzisch, dass mol gmotzt isch… Fleisch lohsch meischtens weg (usserd Schnitzel oder Chicken Nuggets)… defür essisch ab und zuä Gmüäs und Salot.

Sportlich simmer am luägä, was Dir gfallt. Du hocksch uf all Fäll immer stundelang in Pool und idä chältere Johresziite bettlisch Du üs ah, dass mir is Hallebad gönd.
Und Du fahrsch sehr gern Velo, da findet mir sehr cool. Vor allem de Papi het Freud 😉
Sit letscht Wuchä gohsch wieder id Jugi und damol gfallts Dir schinbar und morn probiered mir’s mol mit Unihockey. Hoffentli gfallts Dir (weisch, da isch eifach en coole Sport 🙂 ).

Und jetzt bisch Du im zweite Johr idä Flöte und mittlerwillä chasch es würkli scho guät und mir chönd sogar scho zweistimmig Liädli spiele. Da macht uh Freud!

Oh und Du häsch jo no en chlinä Brüäder öbercho. De häsch Du sehr, sehr liäb und luägsch ehm uh guät… i muäs mir drum Sache alose wiä: Mami, findsch da e guäti Idee, dass de Joa dött ufästiegt? Mami, würdsch gschiider am Joa luägä, als es Sms schriebe… etc. etc. etc.
Du bisch ganz e tolli grossi Schwöschter!!!
Mit em Finn isch es nöd immer eifach und ihr striitet so viel… Mängisch scho am Morge früä… und jetzt häsch also agfange de Finn amel au provoziere 🙂 dött durä bisch e chlini Häx.
Ihr chönd aber au super zämä spiele. Gad am Wuchenend wenner viel Ziit hend, denn goht da uh guät. Und sit ihr di gliche Liäder uf de Instrument chönd, spieled ihr mängisch zämä. Sehr herzig!

Sit 7 Johr bisch Du jetzt bi üs und mir liäbäd Dich so fescht. Du bisch e herzigi, liäbi Superbohnä und mir würäd Dich niä meh hergeh!