1 Johr Joa

Wow, liäbä chlinä Joa! Jetzt bisch Du hüt scho jöhrig worde. Das Johr isch im Nu verbi gange. Es chunnt mir vor, als wärsch Du erscht gad uf d’Welt cho. Du häsch Di vom Schoggi-Baby, wo immer z’friede isch und guät pfuused, idä letschte Wuchä chli zum aaspruchsvollere Chindli entwicklet…
Aber mol de Reihe no. Was mir mit Sicherheit chönd sägä: Du bisch üses mit Abstand gsundeschte Baby gsi. Au wenn’s Di jetzt letscht Wuchä so richtig durägschüttlet het mit Huäschtä, Fiäber und s’erscht mol Antibiotika. Und Du bisch es chlises Zahwunder für üs 😉 Du häsch mit Dinä zarte 365 Täg jetzt doch scho 10 Zäh!!!!! Da findet mir unglaublich viel. Und will jetzt diä cheibe Baggezäh sit Wuchä drucked, bisch Du au so sürmlig und aahänglich in letschter Ziit. Aso mir schiebeds jetzt mol uf Zäh. Was au no chli speziell isch: Du nimmsch kan Nuggi! Ich hett gern, Du würdsch eine näh… vilicht chunnts no 😉 Schloofe goht vo: e mega Katastrophe bis zu Superguät. Isch alles mögli und jedi Nacht isch wieder e Überraschig 😛 😉
Du tuäsch fescht fremde, bisch sehr wählerisch, was Dini Bezugspersonä agoht. Dörf Di nöd mol jede aluägä 😉 aber diä wo Du liäb häsch, dene zeigsch es au ganz fescht mit dicke Umarmige, Händli ufästrecke, wennd zu ihnä wöttsch und Du verteilsch Küssli.
Du häsch ganz viel glernt im letschte Johr. Du chasch scho super frei stoh, häsch scho di erschte Schrittli gmacht, gohsch z’Fuäss d’Stägä duruf, statt uf de Chnü, Du fangsch ah rede und seisch scho ziemli klar „heiss“ und de Elina rüäfsch immer „EIA“ oder soger „ELIA“. Du vergötterisch Dini zwo grosse Gschwüschterti und es isch gegesiitig. Diä beide liäbäd Dich au abgöttisch und es goht eim s’Herz uf, wemmer Eu zuäluägäd.
Au wenn Du gad inärä superstrenge Phase stecksch, chönd und wönd mir üs e Läbä ohni Di gar nümä vorstelle. Du bisch so en herzige Schnuggibollä.

Mir hend hüt Din Geburi in üblicher Rundi gfiiret und es isch würkli ganz e schöns Zämäsii gsi. Au s’übliche Menu uf em Tisch 😆

Du häsch es gnosse, dass öppis gloffe isch. Dini Gschenkli hend Dich zwor gar nöd interessiert 😉 aber ich bin sicher, imä Johr gseht denn da scho ganz andersch us 🙂
S’erschte Stückli Chuächä isch uuu fein gsi und het gschmeckt. Mindeschtens d’Hälfti isch aber am Bode glandet…