6i

Herzigi, grossi Bohnä! Hüt bisch Du 6i worde. Du bisch scho e richtigs Froilein!!!!

Hüt het Di gar nüüt im Bett ghalte. Debi tuäsch Du doch süsch sooooo gern usschloofe. Aber Du bisch scho sit Tage nervös gsi wäg Dim Geburi… so gfreut häsch Di!

Mir hend es spannends Johr gha mit Dir, wo sehr viel passiert isch!

Im Chindi bisch Du jetzt en Schmetterling, ghörsch also zu de Grosse und das findsch Du super! Du häsch viel Fründe im Chindi, verstohsch Di mit allnä Gspänli super und tuäsch uh gern abmache 🙂

Mir sind sehr erstuhnt, wiä Du alles so näbädbii lernsch, wennd bim Finn bi dä Husi zuäluägsch. Du kennsch mittlerwiilä alli Buächstabe und bisch uh interessiert am Läsä. Du chasch jetzt alles läsä. Notürli nonig flüssend, aber Du häsch Dir jetzt es Buäch usglehnt idä Bibliothek mit luuter Grossbuächstabe und tuäsch jede Obig ei Siite Buächstabe für Buächstabe duräläsä. Da machsch Du echt super. Und au bi dä Zahle bisch guät debi. Du tuäsch au gern rechne mit em Finn 🙂

Du häsch au e grosses, luuts Muul öbercho. Uswärts machsch es super und dehai tuäsch denn amel scho sehr frech und seisch was wöttsch. I däm Punkt häsch Du Dich sehr veränderet im letschte Johr. Du bisch sehr selbstsicher worde und das findet mir notürli toll. Au wenn’s jetzt viel strenger isch mit Dir 😉

Dis Grindli isch recht hart worde über di letschte Mönät, aber im Grosse und Ganze tuäsch scho folge 🙂 bisch vor allem recht vernünftig.
Usserd wemmer gad würkli e Krisä hend mit Dir. Denn goht gar nüüt meh. Denn muäsch toibele und tobe. Da würd niämert glaube, wo’s no niä miterlebt hät 😆

Gsundheitlich gohts super. I glaub Du bisch niä würkli chrank gsi im letschte Johr. Wenni zrugg denke, wiä oft mir üs idä erschte Johr hend müäsä Sorge mache… jetzt isch alles guät. Unfalltechnisch isch bi Dir au kas Problem, Du bisch sehr e vorsichtigi. S’einzig, wammer immer hend: dini Bei sind immer vollä Bleuele und mir wüssed amel nöd mol worum diä häsch 😉

Dini Liäblingsfarb isch orange. I glaub immer no, dass da nur isch, wiil Dini Fründin d’Jeannine diä Farb au gern het. Süsch gfalled Dir di typische Meitlifarbe au super. Violett, pink…

Wemmer üs bim Esse zuäluäget, würd me sägä, Du bisch heikel. Aber irgendwiä stimmts nöd. Du tuäsch zwor hüüfig motze und schimpfe wäg em Esse, schlussendli probiersch aber viel und häsch es ebä au gern. S’Theater luägsch Dir glaub chli bim grosse Brüäder ab.
Du gohsch mega gern uswärts go ässä und gnüssisch es au, wenn öppis Feins uf de Tisch chunnt.

Vor ere guätä Wuchä häsch Du mit Flöte aagfange. Mir hend letscht Johr scho gmerkt, dass Du Dich fescht für Musig interessiersch und Du häsch gad gseit, Du würdsch uh gern Flöte lerne. Jetzt häsch also scho Stunde und Dir gfallts sehr. Du bisch uh motiviert und wöttsch immer üäbä. Ich bin gspannt, wiä lang das anähebet 😉

Am liäbschtä tuäsch Du mola und baschtle. Da chasch mit grosser Usduur würkli stundelang. Du häsch au gnaui Vorstellige, wiä öppis sött werde. Denn tuäsch gern Musig oder Gschichtli lose, Lego zämäbaue. Mit bäbälä häsch eher ufghört, aber ich denk, wenn Din chlinä Brüäder denn uf de Welt isch, chönnti das wieder cho. Spiele tuäsch eigentlich sehr vielsiitig. Machsch chli alles gern, drum häsch au so viel (z’viel) Sache 😉
Sportlich bisch nöd würkli interessiert. Sit es paar Wuchä gohsch Du go tanze und das findsch Du lässig. Usserdem tuäsch gern Velo fahre und notürli bädälä. Alles ander machsch nöd so gern und mängisch seisch sogar, dass nöd gern mit em Chindi gohsch go turne.

Aso de Finn tuäsch Du di meischti Ziit immer no ahimmle. Du findsch ihn scho recht lässig 🙂 chläbsch vor allem a ihm, wenner Husi macht und schätzisch’s sehr, wenner mol öppis mit Dir spielt, wo Du wöttsch. Handcherum gohsch Du aber niä mit ihm go tschutte.
Ihr chönd mängisch super mitenand spiele. Gsellschaftsspieli oder ihr lönd Eu öppis mit em Playmobil und de Kapplahölzli ifalle.
Chräftemässig häsch Du uh chogä ufgholt und bisch au nur no 5cm chliner als de Finn 🙂 da heisst, wenner Eu jetzt uf de Deckel gend, chasch Du richtig guät mithebe. Isch amel nöd so schön zum Mitaluägä 😛

De neu Rhythmus mit em Chindi hemmer nonig so drin. Du häsch jetzt jede Morge e Stund meh Chindi plus 2x am Nomitag. Da sind insgesamt 9 Lektionä meh und da isch viel. Du machsch es zwor super im Chindi, aber dehai merked mir fescht, dass Du’s streng häsch. Und jetzt mit em Geburi häsch Du so viel Öbig nöd chönnä iischloofe. Du bisch gad total übermüädet und es mag nöd viel liide.
Mir hoffed, mir wieder de neu Tritt jetzt ganz schnell und Du chasch wieder gnuäg pfuuse 🙂

S’aktuellschte Thema hani also fascht vergesse 🙂 Din chline Brüäder. Du freusch Di so dermasse uf da Baby, es isch soooo herzig. Du redsch di ganz Ziit mit ihm und chasch es chum erwarte, bis er denn do isch! Da isch für üs sehr, sehr herzig zum gseh und mir freued üs mit Dir uf Dini neu Ufgob als grossi Schwöschter, wo Dich im November denn erwartet.

Du bisch e lässigi, liebi, hübschi Bohne. Mir sind so froh, bisch Du bi üs.