10ni

Elina, Du bisch hüt 10ni worde. Unglaublichi 10 Johr alt!

Mir sind ganz gmüätlich in Tag gstartet und Du häsch Dini Päckli dörfä uspacke.

Du häsch Di hüt entschiede, dass de Slow Up ohni Di stattfindet, was völlig ok isch. A Dim Geburi dörfsch Du bestimme. Drum isch de Papi ellai mit em Finn losdüset.

Mir zwei hend underdesse d’Chüächä bache für de Bsuäch am Nomi und morn für d’Schuäl. Du bachsch jo für’s Läbä gern und drum isch da gad läss gsi!

Alli Verwandte sind denn cho go mit Dir fiire und z’Nacht esse. Din Wunsch, dass mir nöd für Dich singed hemmer au dajohr wieder respektiert.

Elina Du bisch ganz e tolli, Du bisch frech, wild und wunderbar 🙂 Mir chömed vo uswärts so viel Kompliment öber, wiä liäb, hilfsbereit und luschtig Du bisch. Mir liäbäd Dich ganz fescht!