8ti

Elina!!! Hüt vor 8 Johr häsch Du üs zu 2fach Eltere gmacht… so schnell gohts, ihr werded so schnell gross. Es isch unglaublich.

Du häsch en riese Gump gmacht und bisch fängs würkli e grosses Meitli.

Wa chani zu Dir verzelle, wo im letschte Johr gange isch?

Du bisch jo vor eme Johr id Schuäl cho. Da findsch Du uh läss und machsch Dini Sach würkli guät. Sobald Du vo dä Schuäl heichunnsch, machsch ohni Murrä sofort Dini Husi. Alles selbstständig und häsch Freud drah. Vor 2 Wuchä bisch idi 2. Klass cho und Du gohsch uh gern id Schuäl.
Dis Liäblingsfach isch Mathe und Du chasch scho richtig guät rechne. Läsä tuäsch jetzt au immer meh und au immer liäber.

Mittlerwiilä bisch sportlich au guät underwegs. Du chunnsch 1-2x is Unihockeytraining und gohsch id Jugi.
Du liäbsch es zum go schwimme und bi üs im Pool bade. Und gohsch au mega gern go bike mit em Papi.

Dini Liäblingsfarbe wechsled immer wieder. Du betonsch immer, dass eigentlich alli Farbe gern häsch. Akutell sind im Moment türkis und pink.

Gsundheitlich bisch recht stabil, usserd Dini Huut macht immer mol wieder chli Mätzli. Akutell häsch so e doofs Ekzem ade Füäss, wo eifach nöd will weggoh 🙁

Bim Esse isch es immer nonig so eifach für mi. Du essisch zwor no öppä Gmüäs und neuerdings mängisch uh viel Salot. Aber bim Fleisch bisch sehr sehr wählerisch. Und mängisch häsch öppis uh gern und d’Wuchä druff scho wieder gar nümä 🙄
Dis Liäblingsesse nach wie vor und wohrschinli für immer: Chicken Nuggets mit Pommes 😉

Du tuäsch noch wiä vor am liäbschte chli werche… baschtle, mole, din Pult püschälä, alles chli ufrüümele… wennd viel Ziit häsch, bisch uh gern i Dim Zimmer und tuäsch CDs lose und chli Sache sortiere. Du tuäsch meeega gern abmache und bisch immer scho am 1s parat zum Dinä Gspönli alüüte.
Du liäbsch es zum Projekt realisiere. Nimmsch immer Bastelbüächer mithei vo dä Bibliothek und zeigsch am Papi, was alles mit ihm wöttsch baschtle. Ihr hend scho mängs Sache mitenand gmacht und es werded no einigi folge.

Du bisch sehr kreativ und häsch viel Ideeä und Plän, wo Du mängisch au eifach so chasch umsetze. Mir sind sehr gspannt, was Du mol us Dine Fähigkeite machsch.

De Finn und Du ligged sich no recht viel idä Hoor. Ihr chönd scho am Morgä afange striite. Und au wenn Du immer Seisch, dass de Finn, de Finn, de Finn… es isch jo bekannt, dass es immer 2 brucht zum Striite 😉
Defür vergötterisch Du de Joa (und er Dich übrigens au sehr!). Du häsch ihn sehr liäb und häsch viel Geduld mit ihm. Usserd er chunnt i Dis Zimmer, wenn Du gad wieder öppis ufgstellt häsch.

Du bisch jo di erscht 5 Läbäsjohr eher zrugghaltend und aapasst gsi und diä Eigeschafte häsch jetzt komplett abgleit. Du seisch chli allnä wo’s durägoht, au am Papi und mir. Du chasch fängs sehr luut werde und au fescht stämpfele und tobe. Und da mit em Ton müämer au mol chli überdenke.
Aber trotzdem bisch Du sehr hilfsbereit und luägsch guät uf Dis Umfeld.

Elina, Du bisch ganz en tolle Mensch mit eme grosse Herz und mir liäbäd Dich sehr fescht. Du machsch es so guät und mir sind sehr stolz uf Dich.