8ti

Sprochlos bini, liäbä Finn! Hüt vor 8 Johr bisch Du uf d’Welt cho und häsch üses Läbä beriicheret. Und hüt häsch Du mit üs Din 8. Geburtstag gfiiiret.

Hüt Morgä bisch Du am halbi sechsi ufgstande. 5:30 Uhr! Da isch z’früä, liäbä Finn 😉 woni bi cho luägä, wer do tüüf idä Nacht scho Liächt gmacht hät, bisch Du im Bett am läsä gsi. I ha probiert zum Di nomol zum Schloofe überrede… aber do häsch Du also nöd mitgmacht.
Din Geburitisch isch dajohr chli schmooler usgfalle 😉 Mir hend s‘ 3-Meter Gool nöd guät chönnä id Chuchi ufäschleicke. Da häsch Du Dir gwünscht und Du häsch Di uh chogä gfreut, dass Du’s au würkli öbercho häsch.

Du häsch Dir Din Pulli wod scho agleit häsch, gad über de Chopf zoge und ganz stolz Dis 8ti-Liibli agleit. Da findi also uh schö, dass Du immer no so gern mini gnaitä Sache ahäsch!

Au dajohr isch es notürli wieder sehr ufregend gsi mit Dir.

S’Wichtigscht: Mir hend züglet! Ins Huus vom Baboo und de Gigi! Da isch de Hammer. Mir hend jetzt no meh Platz und en Garte und de Schuälweg het sich meh als nur halbiert!!! Du wohnsch jetzt i däm Zimmer, wo ich scho ufgwachse bin.
Und Du häsch nomol es Gschwüschterti becho, de Joa. Zum Glück isch es en Brüäder worde, süsch hettet mir jetzt au no en Hund 😉

Du häsch Din Platz gfunde idä Schuäl und machsch es super. So super sogar, dass Du sit es paar Mönät jedi Wuchä dörfsch in Förderunterricht. Eigentlich chönnt me Dich e Klass wiiter ufä stuufe, so vom Schuälische her… aber mir möchtet Dich liäber no chli Chind bliebe loh (was Du au nötig häsch) und Dich nöd vo Dinä Fründe trenne. Drum bliebsch Du wod bisch und machsch liäber no ganz viel usserschuälischi Aktivitätä.
D’Frau Beck hät au chli s’Gschenk mit Dir, denn Du tuäsch sie ganz oft usäfordere, wiä Du das dehai au mit em Papi und mir machsch… Es söll üs jo nöd langwilig werde mit Dir, gell 🙂

Dini schuälische Leischtige sind top, obwohl’s bis jetzt no ka Note geh het. Diä chömed jetzt denn und Du freusch Di scho druff. Mir wüssed anhand vo vielne Gspröch mit dä Frau Beck, was alles i Dir steckt. Mathematisch bisch Du es chlieses Genie (vo mir häsch es nöd 😉 ) und chasch guät logisch vernetzt denke und au sprochlich bisch wiit vorus. Du läsisch mehreri Büächer idä Wuchä und dank em Antolin chunsch au no e schöni Belohnig defür öber. Du liäbsch es nämlich, diä Quizfroge am Computer z’beantworte.
Du häsch all no de Drang zum alles, aber würkli alles usdiskutiere und muäsch immer s’letschte Wort ha. Aber gell… worum au was ändere, mir hettet üs jo jetzt gad scho 7 Johr chönnä drah gwöhnä (Du häsch jo mit 1 agfange rede und sit do isch das eigentli so 😉 ).

Dis Liäblingsfach isch immer no Mathe. Und denn Sport. Und denn Pause 😉
In Sache Husufgobe bisch Du selte gforderet, höchschtens wennd öppis muäsch baschtle oder moole, denn gohts länger wiä 5 Minute 😉

Gsundheitlich hemmer es super Johr gha. Juhui, es goht glaub würkli langsam ufwärts!
Sogar mit dä Auge wirds besser… gad vor es paar Wuchä hemmer de Bscheid öbercho, dass mir mol vorläufig nümä müänd abchläbä. Das het Dich uh gfreut und üs notürli au!

Dini Liäblingsfarb isch jetzt wieder blau. Nümä grüän.

Da mit em Esse… hm… sit es paar wenige Wücheli wirds glaub langsam besser. Du häsch ufghört immer gad sofort motze, wenn öppis uf em Tisch stoht, wo Dir nöd 100% passt. Heikel bisch aber immer no wahnsinnig. Noch em Training wöttsch Du immer Müäsli esse. Will’s so guät tuät mit dä chalte Milch. Und eigentlich würdsch immer gern Müäsli esse. I glaub, Du brüchtisch nüüt anders, als diä Cornflakes 😉

Mittlerwiilä machsch Du eigentlich nümä viel anders, als Fuässball (spiele indoor und outdoor, Bildli sortiere und iichläbä, über Fuässball rede), Läsä, CD’s lose und Gesellschaftsspieli. Guät hemmer de Joa, de cha denn mol mit all dänä viele Lego und em Playmobil spiele, wommer do hend für Di, wo Di nöd interessiert 😉
Dass Du gern Spieli machsch, freut mi mega. Du spielsch fängs würkli cooli Sache wiä DOG, Ubongo, Siedler, Hotel, Spiel des Lebens, Camel Cup… do mached mir no öppä noch em z’Nacht oder am Wuchenend mit dä ganze Familie öppis. Mir zwei spieled au sehr viel, wenn Du mol dehai bisch und nöd abgmacht häsch 😉

Du und d’Elina… jo da isch so e Sach… im Moment striitet ihr meh, als dass ihr Eu verträged 🙁 i weiss aber notürli, dass da normal isch. Cha jo nöd immer Friede, Freude, Eierkuchen si. Ihr föpplet enand scho oft oder haued Eu abe… z.b. Bim Zähbutze oder Schuä aleggä. Da brucht sehr viel Nerve vo minärä Siite 😛
Am beschte verstönd ihr Eu, wenner is Bett söttet… denn spieled ihr i einere Seeleruä oder baued zämä Höhli oder weiss ich was.
Und jetzt isch do jo no de Joa. Din chline Brüäder! Ich glaub Du bisch vom erschte Moment ah uh Fän gsi vo ihm. Jetzt wonner langsam afang uf Eu reagiere und Eu alache, findsch es immer lässiger zum mit ihm Chäsperle. Ich bin gspannt uf da Johr und wiä sich da entwicklet mit Eu. Ich glaub, do cha ganz e schöni Brüäderschaft herewachse.

Finn, Du bisch soooooo en tolle Buäb. Und au wenn ich mängisch ganz viel Nerve bruche oder au viel Schimpfe… ich liäb Dich soooo fescht.
Mir findet Dich so en herzige, ufgstellte und tollä Buäb und mir sind uh chogä stolz uf Dich.